ཁྲི་ཀའི་གནའ་མཁར། ཁྲི་ཀའི་གནའ་མཁར།    ཁྲི་ཀའི་གནའ་མཁར་ནི་ཁྲི་ཀ་རྫོང་མཁར་གྱི་བྱང་རྒྱུད་དང་རྨ་ཆུ་དང་བར་ཐག་སྨི་ལྔ་བརྒྱའི་མཚམས་སུ་བརྗིད་ཉམས་ཀྱིས་གནས་ཡོད་ལ།དེ་ནི་བོད་བཙན་པོའི་དུས་སུ་ཕྱི་དགྲ་འདུལ་ཞིང་ནང་མི་སྲུང་བའི་ཐབས་སུ་བརྩིགས་པའི་གནའ་མཁར་ཞིག་ཡིན་པ་སྨོས་མིད་ཡིན་ནོ།། དེ་ཡང་ཁྲི་ཀ་ཞེས་པའི་དོན་ཡང་བོད་བཙན་པོའི་སྐབས་དེར། མདོ་སྨད་འདི་རུ་འ་ཞ་སྟོང་སྡེ་དྲུག་དང་མཐོང་ཁྱབ་ཁྲི་སྡེ་ཟེར་བ་བཙུགས་པའི་དུས་སུ།མཐོང་ཁྱབ་ཁྲི་སྡེའི་ཁྲི་དཔོན་གྱི་གཞིས་ཀའམ་སྲིད་འཛིན་གྱི་ལྟེ་གནས་ལྟ་བུར་གྱུར་པས་ཁྲི་ཀར་ཐོགས་པ་ནང་བཞིན་དེའི་དུས་སུ་ཡུལ་འདི་ཉིད་ཆབ་སྲིད་ཙམ་མ་ཡིན་པར་ཆོས་སྲིད་རིག་དཔལ་བཅས་དར་རྒྱས་ཀྱི་ཡང་རྩེར་སོན་པའི་སྐབས་ཤིག་ཏུ་མཆིས་ཕྱིར་གནའ་མཁར་ཡང་དེའི་དུས་སུ་བསྐྲུན་པ་ཐེ་ཚོམ་མིད་དེ། ཧྥ་རན་སེ་རྒྱལ་ཁབ་ཀྱི་གྲོང་ཁྱེར་ཆེན་མོ་ཕ་རི་སིར་བཞུགས་པའི་ཏུན་ཧོང་ཡིག་རྙིངP.T.966ཏུ། “མཁན་པོ་ནམ་མཁའི་སྙིང་པོའི་བཤེས་གཉེན་གྱི་རྒྱུད་མདོར་བཤད་པ་ཞེས་པའི་ནང་དུ།སྤུར་ཨན་ཅུང་དབེན་སར་འཁོད་དུ་ཡུལ་མི་རྣམས་ཀྱིས་པན་གདུགས་ཀྱིས་དྲངས་ཏེ་བསྐྱལ་བའི་ཚེ།ཁྲི་ག་མཁར་གོང་དུ་སྟེང་གི་ནམ་མཁའ་ལ་སྤྲིན་ཚོན་སྣ་ལྔ་བྱུང་བ་ཡང་། ཡུལ་མྱྀ་དང་ཕྱུགས་རྫྀ་ཐམས་ཅད་ཀོས་མཐོང་།”ཞེས་བཀོད་པ་ལྟར་ན།བོད་བཙན་པོའི་སྐབས་ཀྱི་དགེ་སློང་ནམ་མཁའི་སྙིང་པོ་མདོ་སྨད་ཁྲི་ཀར་ཕེབས་ཏེ་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་ཅིང་འགྱུར་མིད་སྐུ་ཡི་བཀོད་པ་ཡང་ཁྲི་ཀའི་ཞོང་པོང་དགོན་པར་ཡོངས་སུ་བསྡུས་ཚུལ་བསྟན།རྗེས་འཇུག་སློབ་འབངས་ཀུན་གྱིས་སྐུ་གདུང་དེ་ཉིད་ཨན་ཆུང་གནམ་རྫོང་དུ་བསྐྱལ་བའི་ཚེ་ཁྲི་ཀའི་མཁར་སྟེང་གི་ནམ་མཁའི་མཐོངས་སུ་སྤྲིན་ཚོན་སྣ་ལྔ་ཤར་བ་སོགས་ཀུན་གྱི་མཐུན་སྣང་དུ་གྲུབ་པ་ལ་དཔགས་ན།དེའི་སྐབས་ནས་བཟུང་སྟེ་ཁྲི་ཀའི་གནའ་མཁར་ནི་ཡོད་ངེས་པ་ཞིག་ཡིན་ནོ།།          འོན་ཀྱང་ཁྲི་ཀའི་རྒྱ་ནག་གི་ལོ་རྒྱུས་མང་ཆེ་བར་གནའ་མཁར་འདི་ནི་མིང་རྒྱལ་རབས་ཀྱི་གོང་མ་མིང་ཐའེ་ཙུའུ་ཀྲུའུ་ཡོན་ཀྲང་གི་ཧུང་ཝུའུ་ཁྲི་ལོ་བདུན་པ་ནས་བཅུ་གསུམ་གྱི་བར་ཏེ།སྤྱི་ལོ1374ནས1380ལོའི་སྐབས་སུ་བསྐྲུན་པ་ཞིག་ཡིན་ཞིང་།སྤྱི་ལོ1590ལོར་མཁར་འདིའི་གྲུབ་ཆ་ཁག་ཅིག་གསར་དུ་བསྐྲུན་པ་ནས་བཟུང་སྟེ།མིང་རྒྱལ་རབས་ཀྱི་གོང་མ་ཆིང་མུའུ་ཙུང་གི་ཐུང་ཀྲི་ཁྲི་ལོ་དང་པོ་སྟེ་སྤྱི་ལོ1862ལོར་དང་།ཀྲུང་ཧྭ་མིན་གོའི་སྲིད་ལོ་བརྒྱད་པ་སྟེ1919ལོ།ཀྲུང་ཧྭ་མིན་གོའི་སྲིད་ལོ་བཅོ་བརྒྱད་པ་སྟེ1929ལོའི་བར་དུ་ཐེངས་གསུམ་ལ་ཞིག་གསོ་བྱས་མྱོང་སོགས་བཀོད་ཡོད།གནའ་མཁར་འདི་ནི་གྲུ་བཞི་ཞིག་ཡིན་ལ་མཁར་འདིའི་མཐའ་སྐོར་གྱི་རིང་ཚད་ལ་སྨི227དང་མཐོང་ཚད་ལ་སྨི11.7ཡོད།མཁར་རྟིང་གི་ཞེང་ཚད་ལ་སྨི9.3དང་།མཁར་ཁའི་ཞེང་ཚད་ལ་སྨི4དང་མདའ་ཡབ་ཀྱི་རིང་ཚད་ལ་སྨི1.7དང་།མཁར་ཁར་མདའ་ར་སྨི320བཅས་ཡོད།མཁར་མཐའ་རུ་གཏིང་ཚད་སྨི5དང་།ཞེང་ཚད་ལ་སྨི10.7ཅན་གྱི་དགྲ་འགོག་འོབས་དོང་ཡོད།ལྷོ་བྱང་གཉིས་སུ་མཁར་སྒོ་བཏོད་ཡོད།།     《ཁྲི་ཀའི་རྙིང་མའི་ཆོས་འབྱུང》ལས་བཏུས།   castle subjects 3548 For more information about this term, see Full Entry below.Subjects Geographical FeaturesConstructions, Buildings, & InstitutionsdwellingsFull EntryRelated Subjects (1)Related Places (7)Related Texts (1)Related Images (2) Triga places 1176 For more information about this term, see Full Entry below.Feature Type CountyPlaces EarthAsiaChinaQinghaiTsolho Tibetan Autonomous PrefectureFull EntryRelated Subjects (1)Related Places (76)Related Images (192)Related Texts (116)Related Audio-video (81)