Namkha Temple in Tang and its Rapné Festival   སྟང་གནམ་ཁ་ལྷ་ཁང་དང་རབ་གནས་ཀྱི་སྐོར།   ༉ སྟང་གནམ་ཁ་ཟེར་ཞུ་དགོ་པའི་རྒྱུ་མཚན་འདི་ བོད་ཀྱི་བཀའ་བརྒྱུད་བླ་མ་ གནམ་ཁ་བསམ་གྲུབ་ཟེར་མི་འདི་ ཁོ་རའི་ལུང་བསྟན་དང་འཁྲིལ་ ཁོ་ཡར་བོད་ལས་མར་ནུམོ་གང་བྱོན་སྦེ་ གནམ་མ་ལངམ་ཚུན་ཚོད་ བྱོན་ལམ་རྐང་ཐང་འབད་བྱོན་ཏེ་ དྲོ་པ་གནམ་ལངམ་ཅིག་ ས་གནས་ག་ཏེ་ལྷོད་ས་ལུ་ གདན་ས་གི་ལུང་བསྟན་འདི་ དེ་ན་ཨིན་ཟེར་གསུངས་ཏེ་ དེ་འཕྲོས་ལས་བྱོན་སྦེ་ སྐུ་ངལ་གནང་བཞུགས་ར་མ་བཞུགས་པར་བྱོན་ཏེ་ སྟང་གནམ་ཁ་ལྷ་ཁང་ཆགས་ཏེ་ཡོད་སར་ལྷོདཔ་ཅིག་ གནམ་ལངས་སོངཔ་ལས་ ད་ ངེའི་གདན་ས་གི་ལུང་བསྟན་འདི་ དེ་ཁ་ལུ་ཨིན་པས། ངེའི་གདན་ས་འདི་དེ་ནང་བཅགས་ནི་ ཟེར་གསུངས་ཏེ་ དེ་འཕྲོས་ལས་གདན་ས་གི་ས་བཅགས་ནི་འགོ་བཙུགས་ཏེ་ ལྷ་ཁང་དེ་བཞེངས་ནུག དེ་སྦེ་ ལུང་བསྟན་དང་འཁྲིལ་ཏེ་ གནམ་ལངམ་ཅིག་ཐོབ་ནི་དེ་གིས་དང་ བླམ་ཁོ་རའི་མཚན་ཡང་ གནམ་ཁ་བསམ་གྲུབ་ཟེར་ ཁོ་ར་གི་མཚན་ལས་ལྟ་དྲངས་ཏེ་ ལྷ་ཁང་གི་མིང་ཡང་ གནམ་ཁ་ལྷ་ཁང་ཟེར་ བཏགས་གནང་གནངམ་ཨིན་པས།   དེ་ལས་བླམ་ཁོ་ར་བཀའ་བརྒྱུད་གོང་མ་གི་སློབ་མ་ཅིག་འབདཝ་ལས་བརྟེན་ ཡར་ལས་མར་འབྱོནམ་ད་ ཆོས་སྐྱོང་སྲུངམ་ ལྷམོ་དང་མགོན་པོ་གཉིས་ཡང་ བླ་མའི་ཕྱག་ཞུ་སྟེ་བྱོན་ དེ་ལས་ ས་གནས་དེ་ཁར་ཕེབས་པའི་སྐབས་ དེ་ཁའི་སའི་བདག་པོ་གཏེར་བདག་རིན་ཆེན་མགོན་དབྱངས་ཡང་ བླ་མའི་ཕྱག་དབང་བཅར་ཡི་ཟེར་བའི་ལོ་རྒྱུས་ཡང་བཤད་ནི་འདུག རྒྱུ་མཚན་དེ་ལས་བརྟེན་ ད་རིས་ནངས་པར་ གནམ་མཁའ་ལྷ་ཁང་ནང་ ལྷ་མགོན་དང་གཡག་འཆམ་གྱི་སྐུ་འཆམ་གནང་སྲོལ་ཡོད་མི་འདི་ དེ་ལས་བརྟེན་ཨིན་པས། མཐོ་བྲག་བླམ་པདྨ་ཤེས་རབ་རྡོ་རྗེ་གིས་བཤད་མི་ནང་ ལྷ་མོ་འདི་ཨ་ཞེམོ་དང་ མགོན་པོ་འདི་ནུ་གཅུང་ཨིནམ་ད་ བླ་མའི་ཕྱག་ཞུ་སྟེ་བྱོན་པའི་སྐབས་ ནུ་གཅུང་མགོན་པོ་འདི་མི་འབྱོན་ཟེར་ཞུཝ་ད་ ཨ་ཞེམོ་གིས་ཉན་མ་བཏུབ་པར་ ནུ་གཅུང་ཙིགཔ་ཟ་སྟེ་ ཨ་ཞེམོ་གི་ཞབས་གུ་རྡོ་འཐུ་བླུགསཔ་ད་ཕོག་ནི་དེ་གིས་ ད་རིས་ནངས་པར་ གནམ་ཁ་ཚེ་བཅུའི་བསྒང་ སྐུ་འཆམ་གནང་པའི་སྐབས་ལྷ་མོའི་ཞབས་ ཞ་ཐེངས་ཞ་ཐེངས་བཏང་གནང་ནི་ཡོད་ཟེར་ཨིན་མས། དེ་ལས་ ལྷ་ཁང་འདི་བསྒྲུབས་པའི་ཤུལ་ལས་ རབ་གནས་མཛད་ནི་གི་དོན་ལུ་ས་གནས་དེ་ཁའི་མི་ཆ་ཁྱབ་ འཆམ་དང་ཞབས་ཁྲ་རྐྱབ་ནི་སྦེ་འབོ་ཞིནམ་ད་ རབ་གནས་གནང་པའི་སྐབས་ མཐོ་བྲག་དགོན་པ་གི་བཀའ་སྲུང་གཏེར་བདག་རིན་ཆེན་མགོན་དབྱངས་དེ་ཡང་ མར་རབ་གནས་གནང་ས་ལུ་ སྐུ་འཆམ་གནང་པའི་གྱལ་ཁར་འཛུལ་ཏེ་སྐུ་འཆམ་གནངམ་ལས་ རབ་གནས་སྐབས་གཡག་འཆམ་གནང་ནི་ཡོད་མི་འདི་ རྒྱུ་མཚན་དེ་ལས་བརྟེན་ཨིནམ་ད་ དུས་དེ་ལས་འགོ་བཟུང་ གནམ་ཁ་གཡུས་ཚན་དེ་ནང་ རབ་གནས་གནང་ནི་གི་སྲོལ་འདི་ ལོ་བསྟར་བཞིན་དུ་ཧེ་མ་ལས་ས་གནས་ཀྱི་བདག་སྐྱོང་པ་དྲུངམ་ཟེར་ ད་རིས་ནང་པར་འབད་བ་ཅིན་ དྲུང་པ་དེ་གིས་ མིང་ཐོ་བཀོད་དེ་ ཁྲལ་བཟུམ་སྦེ་ར་ རང་ར་སོ་སོ་གི་འགན་ཁུར་སྤྲོད་སྦེ་ ¬དུས་ད་ལྟོ་གི་བར་ན་ཡང་ ལམ་སྲོལ་འདི་ཉམས་མ་བཅུག་པར་གནང་སྟེ་ར་འདུག   ¬དེ་ལས་རབ་གནས་ཀྱི་ལས་རིམ་འབད་བ་ཅིན་ ལོ་ལྟར་བཞིན་དུ་ཉིནམ་གསུམ་རེ་བརྩི་སྲུང་ཞུ་ནི་ཡོདཔ་ད་ ཉིནམ་དང་པ་ནང་འབད་བ་ཅིན་ ཆོསཔ་ཚུ་གིས་གཏོར་བཞེངས་གནང་ཚརཝ་ཅིག་ གསུང་ཆོག་གནང་བཞུགས་པའི་རིང་ སྐུ་འཆམ་གནང་མི་ཚུ་ཡང་བཅའ་སྒྲིག་ཀྲིག་ཀྲི་རྐྱབ་ཚུད་དོ་ཡོདཔ་ལས་ ཕྱི་རུ་ཁམ་ཅིག་ཁར་ དང་པ་གཞསམོ་རྐྱབ་མི་ཚུ་གིས་གཞསམོ་རྐྱབ་ དཔའ་མཛངསཔ་ཚུ་གིས་རྟིང་བདའ་ལེགས་སོ་བསྐུལ་ཏེ་ ལྷ་ཁང་གི་རྡོ་ཆལ་ནང་བྱོན་ཞིན་ལས་མར་ཆང་གཏོར་ མར་ཆང་གཏོར་ཚར་བའི་ཤུལ་ལས་ དཔའ་མཛངསཔ་གསུམ་སྐོར་རྒྱབ་འབད་དེ་ རྦད་ཚར་གསུམ་རྐྱབ་སྟེ་ དགྲ་བོ་ཆ་ཁྱབ་དམ་ལུ་བཏགས་ དེ་ལས་དཔའ་མཛངསཔ་དང་གཞསམོ་རྐྱབ་མི་ཚུ་གིས་གཞས་དང་ཞབས་ཁྲ་རྐྱབ་ དེ་གི་རྟིང་བདའ་ ལྷ་མགོན་གཉིས་དང་གཡག་འཆམ་གྱི་སྐུ་འཆམ་གནང་པའི་ཤུལ་ལས་ གླུ་གཞས་ཀྱི་ལས་རིམ་དག་པ་ཅིག་གི་རྒྱབ་ལས་ ཕྱི་ཁའི་ལས་རིམ་ཚུ་བམ་གྲོལ་ཞིནམ་ལས་ ནང་ན་ལུ་ ཆོསཔ་ཚུ་གིས་ མཆོད་པའི་བྱིན་རླབས་དང་ཆོས་སྲུང་ ལྷམོ་དང་མགོནམོ་གི་གསུང་མཆོད་གནང་བཞུགས་པའི་སྐབས་ལུ་ སྐུ་འཆམ་གནང་མི་དང་གཞས་གཞསམོ་ དཔའ་མཛངསཔ་དང་ དེ་ཁར་འཛོམས་ཡོད་མི་ག་ར་ལུ་ སིང་ཆང་བྲོཝ་གར་དྲགས་ཚུ་དྲངས་ནི་འདུག   དེ་ལས་ བམ་གྲོལ་བའི་ཤུལ་ལུ་ ལྷ་མགོན་ གཡག་ བླམ་ཚུ་ དཔའ་མཛངསཔ་དང་གཞསམོ་ཚུ་གིས་ ལྷ་ཁང་གི་ཕྱི་ཁར་ ཁྲོམ་ཟེར་ ཐང་ནང་ལུ་ ལེགས་སོ་དང་བཅས་པ་སྦེ་གདན་འདྲེན་ཞུ་ཏེ་ རྡོ་ཆལ་ནང་བཟུམ་སྦེ་ར་ ལས་རིམ་ཚུ་རིམ་པ་བཞིན་དུ་ ནུབ་མོ་ཆུ་ཚོད་བརྒྱད་དགུ་ཚུན་བཞུགས་ནི་འདུག དེ་ལས་ ཉིནམ་གཉིས་པ་ནང་འབད་བ་ཅིན་  དྲོ་པ་ལས་ཆོས་རྗེ་ཟེར་ ཨོ་རྒྱན་ཆོས་གླིང་གི་ཆོས་རྗེ་དང་རྒཔོ་ཞུ་ནི་ཟེར་ རབ་གནས་ཀྱི་སྐབས་ སྐུ་མགྲོན་བཟུམ་ཅིག་སྦེ་ཞུ་ནི་གི་སྲོལ་ཅིག་འདུག ཁོང་ཞུ་བའི་སྐབས་ཡང་ ཨོ་རྒྱན་ཆོས་གླིང་ལྷ་ཁང་དང་ཁང་རབ་ཀྱི་ལྷ་ཁང་ནང་ལེགས་བཤད་དང་ཞབས་ཁྲ་ལེའུ་ཐེངས་གསུམ་དེ་ཅིག་རྐྱབ་སྲོལ་འདུག ཉིནམ་གཉིས་པ་དང་གསུམ་པ་ནང་ཡང་གཞན་སྐུ་འཆམ་དང་གཞས་ ལེགས་སོ་གླུ་གཞས་ལ་སོགས་པའི་ལས་རིམ་ཚུ་ཅོག་ར་འཐདཔ་སྦེ་གནང་སྲོལ་འདུག ཨིན་རུང་ ཉིནམ་གཉིས་པ་དང་གསུམ་པའི་ནང་མ་འདྲཝ་གཅིག་ གཡུས་ཚན་གྱི་ཁྱིམ་གུང་པ་རེ་ལས་ ནང་གི་ཨམ་རེ་རེ་གིས་ ཏའི་ཏའི་ཟེར་ ཆུམ་གྱིས་བཟོ་བའི་ཚོགས་དང་ཆང་འབག་སྟེ་ བླམ་དང་ཕྱི་ཁའི་མི་དྲག་དྲགམ་ དེ་ལས་ དཔའ་མཛངསཔ་ཚུ་ལུ་ རྡིག་རྡིགམ་འབད་དེ་དྲངས་ཚར་བའི་ཤུལ་ལུ་ དགའ་ཚོལ་བཟུམ་ཅིག་འབད་ བང་ཅུང་ལོག་སྤྲོད་པའི་སྐབས་ལུ་ རང་གི་འབྱོལ་པ་དང་བསྟུན་ཏེ་ བང་ཅུང་ནང་བཙུགས་ཏེ་སྤྲོད་དགོཔ་དང་ གཡུས་མི་ཚུ་ཨིནམ་པ་ཅིན་ ཚོགས་ཡང་ལག་པར་བྱིན་ཏེ་ ཁོང་ཚུ་གིས་འབད་བ་ཅིན་ ཏི་རུ་ཡང་སྤྲོད་མི་དགོ་པས། རྫོང་ཁག་གཞན་ཁ་ལུ་མེད་པའི་ལམ་སྲོལ་མ་འདྲཝ་ཅིག་ བུམ་ཐང་སྟང་ལུ་འདུག་ཟེར་ཞུ་ནི་ལགས།།   །།   Lhakpa Gyonpo is a researcher for the Loden Shejun Cultural Programme. Consecration subjects 7674 For more information about this term, see Full Entry below.Subjects Tibet and HimalayasBhutan Cultural LibraryCultural EventReligious EventFull EntryRelated Subjects (1)Related Texts (1)Related Images (16) Account of a Monastery or Temple subjects 7821 For more information about this term, see Full Entry below.Subjects Tibet and HimalayasBhutan Cultural LibraryOral TraditionHistorical Account and NarrativeAccount of Sacred ObjectsFull EntryRelated Subjects (1)Related Texts (5)Related Images (456)Related Audio-video (44) Bhutan Cultural Library subjects 8260 For more information about this term, see Full Entry below.Subjects Tibet and HimalayasFull EntryRelated Subjects (1131)Related Places (4370)Related Texts (265)Related Images (28434)Related Audio-video (2327)Related Sources (1) Namkha places 18104 For more information about this term, see Full Entry below.Feature Type Village, 4th admin unit (Bhutan)Places EarthAsiaBhutanBumthangTangKhangrabFull EntryRelated Subjects (4)Related Places (1)Related Texts (1)Related Images (504)Related Audio-video (3)